KALIUETE: kere-kere enia Lovaya lukuni (Makua), mar lafanen ta’a ahar luku-lukun en hai molu, i mai-maisina ia on ane, akam molu na’uvara akam nar fanumela.
KALIUETE : i nemana i taracerun unit tu eluhen nacun lauhpai, (lauhana taracerunu). lukun enia afa nau-ukum navare nawara vaci cai-let afa tua tutu nara afa nita taracerun em evanca : KALIO…….afi lanura tu afi apur tua tutu nara WETA ivim liare.
Marlauhanat kar KALIUETE em namai en nia i eceremun ho i heluhana ia ukani, tavar eluhet Lospala i Mu’a-cauvele-Horo-cauvele, le tein, luku-lukun tein fain-fain teini karua ica hai molu, nar ica tutu kar molu. ina kaliuete imarluhana ina na’utali neluhen eceremunit heluhana em emerpela, ina eluhetu faia-fain, lukun ho hoponi, luahana Lospala mocor ihinit karua afi tavalauhe en tavar tapa molu.
Marluhana mua afarika na’en mau, Malpitini, tavaro eluhenu kar mau nina naum afi lata tein e toto. ne tein e toto, eluhenu vari, nanipo tavar akam nerenavare, Lospala i Mua-cauvele, Horo-cauvele en tei, ina keluhet tu mar tapa maun ne’e tein ere, lata tein ere me, ali eme la hini fai.
KALIUETE imara lauhana hailanu nina haim aci, hai navare tu karua nacun lafanenu hai molu, ina it ratan afi Cal-Pal afur, eme-emerana fai ia karua ura mokoren akam hai navare. afa em a’ace e nara ratan afi on mokore, afa ili-ililaka mene cicirain fai, afa sei-sei fai, afa pati-patin fai, afa siki-sikire, vau-vaure, nanipo oras en hai nupe, ratan Java i tempu naen nar afa jen-liare (Jen-ukune) naen kar haimau aya ira eni, fai-fain ho leleulana it afa ratan mokore, afi Cal-Pal ratan fai ia hai molure.
Ratan afi-ono mokore afi Cal-afur Ratam afi aci lolo, afa rata lafanavare, tavar Rata Lolo navar Lusu o amue, pulao mana, tutuana navar mana ho amue. afa rata lafan navare, nanipo karua en afa hai na’u uku malufe.?tenaet tua…………..??
Nacun unit tu nautali nemana vale ia Fataluku: luku-lukun unit tu Lospala Mucune nau ukum navare, luku-luku nuni tu Fata-ca, fata-kere, fata-neceremu, fatapai. inemani ia inai, keluhetu luku-lukun itelira tapa Fataluku e tavalauhe, tapa Fataluku e kaparpai. enia eceremun ho fai-fain unitu ratan Cal naen hai fai tua- Pal naen hai ta tua, Cal-Pal naen hai fai tua.
Fataluku enia nacun unit tu nau je’ene, Lospala nae lata ecen akam Fataluku eta, mas lata i touria nau’uku Fataluku ta. Luku-lukun enia tapin afa na’u uku navare mas afa kam em rau-raun ca, Fataluku mucune luku-lukun unit tu hai nau evene, inemana na’u tali hiamoi tu tour tali lulue it afi Cal-Pal em Nololo, em Vaihoho, em Etekuru Lopo, enereni. ivi hinta mar ten malu mau akam navare nara ahar afi Fataluku en nemana pali, mas afa Lospala mocor ia afa hini na’u tali navare, afa hini na’u tali lolue, afa hini na’u tali fiare.
Lauhana, fafain, afa Lospala na’en hai a lauhe ia je’ene tua, akam mua itouri va’ane, afitar hai na’ula tahi afarika na’e o afi on fuluhemau nu Mu’acauvele-Horocauvele ehin mau, mau nu Pal navare-Kaka navare, Leren Navare, Moco navare, La’an-Tava navare.
maun Le’e-luka-Ruruka vari i navare, mau nu Palu tua tein i tutu-Calu tua tein tutu, maunu Inaleupitin i horu lau’laune-Fanuleupitin ihoru le-lete afita ali fulehen la tahi afarika maran, Epul i anahe, sorot inahe, lauhana anehen fulehen maun em Jeu acanate, Moco acanate, Muacauvele-Horocauvele Acanate. en Luku-lukun unit tu ana em la’an tava it karua ten mua afarika na’en ten kere-kere e lere nara, enia taracerun unit tu afa em nita tara ceru, po ia ivina’e o ia iarau-rau, tana rau-rau, potina o enacone, aratana o enacone, Ocava-Marau, Cal-Pal evari horupe, non ita Fualehen maunu afi lata ali napemau.
helehuhana, eceremun ina haim apela enit hin karua ina e mocor haini, enokor haini, ecal haini, ina eluhetu afa horupenu cire somene, afa horupenu fai-fain, eceremun Cal naen hai ta’a e somene, Pal naen hai ta’a hai fai enerem emerpela.
enit ini heceremuni, ini luku-lukuni. eceremunit kar ina haim apela enia taracerun unit em afi taracerut tu afa horupenu somone, afa horupenu eceremun iraunim apela.
inara ehaini…ina KALIUETE imarlauhana ina loluana lafaim enina….
Purupalana ho Loluana lafaitu ina vari etaraceru
